ချင်းပြည်နယ်သည် တိမ်စင်္ကြံထက်တွင် တည်ရှိသော တောင်တန်းကြီးများ၊ သဘာဝတောတောင် ရေမြေအလှတရားနှင့် ထူးခြားသော တိုင်းရင်းသားရိုးရာ ယဉ်ကျေးမှုများကြောင့် အထူးထင်ရှားကျော်ကြားလှပါသည်။ ချင်းပြည်နယ်၏ အထင်ကရ သဘာဝအံ့ဖွယ်များအနက် အသည်းနှလုံးပုံသဏ္ဌာန်ရှိသော ရိဒ်ရေကန် (Rih Lake) သည် ဒဏ္ဍာရီဆန်ဆန် သမိုင်းကြောင်းများနှင့်အတူ ချင်းလူမျိုးတို့၏ အထွတ်အမြတ်နေရာအဖြစ် ရပ်တည်လျက်ရှိပါသည်။ ထို့အပြင် တောင်ဇလပ်ပန်းများ ဖူးပွင့်ရာ ချင်းတောင်တန်း၏ အမြင့်ဆုံးတောင်ထွတ်ဖြစ်သည့် ဝိတိုရိယတောင် (ခေါ်) နတ်မတောင် (Nat-Ma-Taung) သည်လည်း သဘာဝဇီဝမျိုးစုံမျိုးကွဲများနှင့် တောင်ပေါ်ရှုခင်းအလှတို့ကြောင့် ကမ္ဘာတစ်ဝန်းတွင် ကျော်ကြားလှပါသည်။
ပြင်ဦးလွင် အမျိုးသားအထိမ်းအမှတ်ဥယျာဉ်အတွင်းရှိ ကစားကွင်း (Amusement Park) အနီးတွင် တည်ရှိသော ချင်းပြည်နယ်ပြကွက်၌ ဤသဘာဝအထိမ်းအမှတ်နေရာ (၂) ခုလုံးကို စကေးပုံစံတူ လက်ရာမြောက်စွာ ဖန်တီးပြသထားပါသည်။ မူရင်း ၆,၅၃၄,၀၀၀ စတုရန်းပေ ကျယ်ဝန်းသော ရိဒ်ရေကန်ကို ၁:၆၅၀ အချိုးဖြင့် ၁၀,၀၅၂.၃၁ စတုရန်းပေ အကျယ်အဝန်းရှိ ကန်ငယ်အဖြစ်လည်းကောင်း၊ မူရင်းအမြင့်ပေ ၁၀,၀၁၈ ပေရှိသော နတ်မတောင် (ဝိတိုရိယတောင်) ကို ၁:၂၀၀ အချိုးဖြင့် အမြင့် ပေ ၅၀ ရှိ တောင်ကုန်းပုံစံငယ်အဖြစ်လည်းကောင်း ရိဒ်ရေကန်ဘေးတွင် စနစ်တကျ တည်ဆောက်ထားပါသည်။
ဤပြကွက်သည် လာရောက်လည်ပတ်သူများအား ချင်းပြည်နယ်၏ အေးချမ်းသော တောင်တန်းဒေသ အလှတရားနှင့် သဘာဝပထဝီဝင် အံ့ဖွယ်များကို ပြင်ဦးလွင်မြို့တွင် တစ်နေရာတည်း မျက်ဝါးထင်ထင် လေ့လာခံစားခွင့် ပေးစွမ်းထားပါသည်။ တောင်တက်ခရီးလမ်း ကြမ်းတမ်းသည့် ဒေသများသို့ ကိုယ်တိုင်မရောက်ရှိနိုင်သည့် ခရီးသွားမိသားစုများနှင့် ကျောင်းသားလူငယ်များအတွက် ချင်းတောင်တန်း၏ သဘာဝပတ်ဝန်းကျင်ကို ဗဟုသုတရရှိစေပြီး အမှတ်တရ ဓာတ်ပုံရိုက်ကူးရန် အလွန်ဆွဲဆောင်မှုရှိသော နေရာတစ်ခု ဖြစ်ပါသည်။
စကေးနှင့် အချိုးအစား -
- ရိဒ်ရေကန် - မူရင်းအရွယ်အစား ၆,၅၃၄,၀၀၀ စတုရန်းပေ၊ တည်ဆောက်ထားသည့်အရွယ်အစား ၁၀,၀၅၂.၃၁ စတုရန်းပေ၊ အချိုးအစား ၁:၆၅၀
- ဝိတိုရိယတောင် (နတ်မတောင်) - မူရင်းအရွယ်အစား ၁၀,၀၁၈ ပေ၊ တည်ဆောက်ထားသည့်အရွယ်အစား ပေ ၅၀၊ အချိုးအစား ၁:၂၀၀