စစ်ကိုင်းတိုင်းဒေသကြီးသည် မြန်မာနိုင်ငံ၏ ထေရဝါဒဗုဒ္ဓဘာသာ ထွန်းကားပြန့်ပွားရာ အဓိက သာသနာ့နယ်မြေကြီးဖြစ်ပြီး သမိုင်းဝင် ဗုဒ္ဓသာသနိက အဆောက်အအုံများနှင့် စိတ်အေးချမ်းဖွယ်ရာ သဘာဝရှုခင်းများကြောင့် အထူးထင်ရှားကျော်ကြားပါသည်။ ဧရာဝတီမြစ်ရိုးတစ်လျှောက် တည်ရှိသော စစ်ကိုင်းတောင်ရိုးသည် စေတီပုထိုးပေါင်းများစွာနှင့် သီလရှင်၊ ရဟန်းသံဃာတော်များ သီတင်းသုံးရာ ဘုန်းတော်ကြီးကျောင်းများ ဝန်းရံလျက်ရှိပြီး၊ သမိုင်းဝင် ရာဇမဏိစူဠာ ကောင်းမှုတော်စေတီကြီးမှာလည်း ထူးခြားသည့် သပိတ်မှောက်ပုံစံ သပ္ပာယ်ကြည်ညိုဖွယ် ဗိသုကာလက်ရာဖြင့် ပြည်တွင်းပြည်ပ ဘုရားဖူးများအကြား ထင်ရှားလှပါသည်။
ပြင်ဦးလွင် အမျိုးသားအထိမ်းအမှတ်ဥယျာဉ်အတွင်းရှိ စစ်ကိုင်းတိုင်းဒေသကြီး ပြကွက်တွင် ဤအထင်ကရ သာသနာ့အမွေအနှစ်နေရာ (၂) ခုလုံးကို ချင်းပြည်နယ်နှင့် ကချင်ပြည်နယ် ပြကွက်များအနီး၌ သေသပ်လှပစွာ စကေးပုံစံတူ တည်ဆောက်ပြသထားပါသည်။ မူရင်းဉာဏ်တော် ၁၁၈ ပေရှိသော ကောင်းမှုတော်စေတီတော်မြတ်ကြီးကို ၁:၉ အချိုးအစားဖြင့် အမြင့် ၂၀.၅ ပေ ပုံစံငယ်အဖြစ်လည်းကောင်း၊ မူရင်းအမြင့်ပေ ၁၃၇၃ ပေရှိသော စစ်ကိုင်းတောင်ကို ၁:၂၂ အချိုးအစားဖြင့် အမြင့် ပေ ၆၀ ရှိ တောင်ကုန်းပုံစံငယ်အဖြစ်လည်းကောင်း စနစ်တကျ ဖန်တီးပုံဖော်ထားပါသည်။
ဤပြကွက်သည် စစ်ကိုင်းဒေသ၏ သာသနာရေးဆိုင်ရာ အရေးပါမှုနှင့် သဘာဝပထဝီဝင် အလှတရားတို့ကို တစ်နေရာတည်းတွင် မျက်ဝါးထင်ထင် လေ့လာခံစားနိုင်စေရန် ဖန်တီးပေးထားသည့် အဓိကနေရာတစ်ခု ဖြစ်ပါသည်။ လာရောက်လည်ပတ်သူ ဘုရားဖူးများနှင့် ခရီးသွားပြည်သူများသည် အညာဒေသ စစ်ကိုင်းတောင်ရိုး၏ ငြိမ်းချမ်းသော အငွေ့အသက်နှင့် ရှေးဟောင်းဗိသုကာ အလှတရားတို့ကို ပြင်ဦးလွင်၏ သာယာလှပသော ပတ်ဝန်းကျင်ကောင်းတွင် အနီးကပ် လေ့လာမှတ်တမ်းတင်နိုင်မည် ဖြစ်ပါသည်။
စကေးနှင့် အချိုးအစား -
- ကောင်းမှုတော်စေတီ - မူရင်းအရွယ်အစား ၁၁၈ ပေ၊ တည်ဆောက်ထားသည့်အရွယ်အစား ၂၀.၅ ပေ၊ အချိုးအစား ၁:၉
- စစ်ကိုင်းတောင် - မူရင်းအရွယ်အစား ၁၃၇၃ ပေ၊ တည်ဆောက်ထားသည့်အရွယ်အစား ပေ ၆၀၊ အချိုးအစား ၁:၂၂